政情：張宇人嫁女田二少避席
自由黨飲食界立法會議員張宇人（Tommy）尋晚為嫁女補擺喜酒，正、副主席劉健儀同方剛以及兩位黨內精神領袖田北俊同「莎姐」周梁淑怡，齊齊到賀，為近期接連發生內部人事震盪嘅自由黨沖沖喜。嫁出嘅女，如潑出嘅水，離巢黨友亦一樣，退出自由黨時強調和平分手嘅田北辰，同樣收到請柬，但尋晚一直無現身，反映田二少同自由黨經歷早前隔空互責後，舊情已覆水難收。
方國珊申請退黨
自由黨風雨滿途，剛辭去新界東支部主席嘅方國珊，認為同高層喺理念上嘅鴻溝無法收窄，尋日決定今日搞埋手頭上嘅勞工權益行動，傍晚正式申請退黨。至於會否加入葉劉淑儀嘅新民黨，佢話暫時無諗過。
Tommy早前喺美國嫁女，尋晚喺金鐘港麗酒店補擺喜酒，田少等自由黨高層全部畀面到齊，保安局局長李少光、中總立法會代表黃宜弘，連埋已淡出自由黨核心嘅前旅遊界代表楊孝華以及○八年退黨另起爐灶嘅「3L」，即係林健鋒、梁君彥同梁劉柔芬，都念在昔日情誼分上，同時攜眷出席，食埋美點雙輝先至走，相當捧場。反而Tommy口中「相識四十年嘅好朋友」田二少，則缺席喜宴，為呢次退黨恩仇再添枝節。
Tommy呢場喜宴早喺田二少退黨前早已安排，即使Tommy同田二少嘅政治理念如何南轅北轍，總算相交一場，所以亦有派帖畀田二少。其後田二少退黨，鬧得不歡而散，難怪身在香港嘅田二少，尋晚都唔赴張家喜宴。至於田二少點解唔捧場，到底係仲嬲緊Tommy、定係費事尷尬呢，相信只有田二少自己至知嘞。
其實，Tommy同田二少心病唔少，早係政壇公開秘密。今年三月Tommy鬧出最低工資「廿蚊論」風波，田二少公開話Tommy言論唔代表自由黨，同Tommy劃清界線；其後嘅大家樂扣飯鐘錢事件，二人又公然唱對台，關係不斷惡化，田二少依家仲走到退黨呢一步，同Tommy連表面「團結」都唔使顧念啦。唔通田二少決定同自由黨完全割席？
落葵涌派暖風機
黨友嫁女，田少喜形於色。田少出山，佢話明唔做自由黨黨魁，但個黨即時有錢做嘢，現計劃落區「開檔」，成立七個地區辦事處，以示直選決心不變，今日頭炮係落葵涌派暖風機，呢個正係田二少準備出戰嘅新界西。