中環出更：許晉平湊兒開餐溫情滿屋
「九巴金公主」伍穎梅（Winnie）同中建企業董事許晉平嘅戀情曝光後，令向來低調嘅許晉平瞬間人氣急升，事關大家都聯想起兩人喺中環置地廣場Cafe Landmark歎茶「手疊手」談心嘅甜蜜一幕。不過，卓妮發現許晉平撐枱腳嘅對象唔止係Winnie一個，佢有時都會同囝囝撐枱腳食飯，做個廿四孝老竇，而且都係揀公司附近嘅Cafe Landmark，認真係愛情親情兩兼顧。
上星期五傍晚六點鐘，卓妮行過Cafe Landmark，見許晉平同囝囝喺度聚餐，全程有傾有講好開心，佢囝囝更不時開懷大笑。作為爸爸嘅許晉平對囝囝關懷備至，好似食主菜「龍蝦芝士麵」，佢就幫囝囝拆龍蝦肉，又用餐巾幫囝囝抹嘴，非常溫馨。期間地下大堂表演Tic-tak舞，許晉平就拖住囝囝到欄杆邊由高處俯瞰欣賞。
許晉平同囝囝大約食到七點埋單離開，卓妮見佢哋迎面而來，兩父子果然成個餅印，睇佢哋拖住手漫步嘅背影，呢份父子情實在感人，最後許晉平安排名下一輛落地只有幾個月、價值六十多萬元嘅豐田Alphard豪華七人房車接載囝囝離開，佢自己就返回隔鄰嘅中建大廈辦公室繼續工作。
聞伍穎梅笑開懷
卓妮上前同許晉平打聲招呼，問佢係咪同囝囝食飯，佢就好開心話：「係呀！」但點解唔見同新女友Winnie一齊呢？佢就甜絲絲答話：「唔知呢！」問佢幾時同Winnie拉埋天窗，佢更加開懷大笑。雖然許晉平無透露半點戀情，但從佢由心而發嘅興奮心情，睇怕佢同Winnie都係打風都打唔甩喇！
