港府十月底公布政改本地立法建議，各政團早已分析建議利弊，點知「民主阿婆」陳方安生慢幾拍，尋日先開記者會發表意見，但觀點冇乜新意，仲自打嘴巴。
民主阿婆話，區議會超級議席違反普選原則，但之後佢被問及會否參選超級區議會議席，佢竟然笑笑口話：「如果我五十歲就去選！」真係乜都畀佢講晒，唔通五十歲去選超級議席，就唔算違反普選原則咩？
終於都認老嘅民主阿婆仲對擔當泛民共主死心不息，指手畫腳咁叫民主黨同公民黨要好好哋坐低傾吓，睇吓可以點樣提升特首同立法會兩個選舉產生辦法嘅民主基礎。民主阿婆嘅影響力早已壽終正寢，佢嘅建議，兩大黨都唔領情。兩黨如果傾得埋欄，都唔使等到今時今日等佢嚟開聲喇。對於佢嘅建議，公民黨話，如果民主黨可以接納公民黨嘅建議，咁就一定會同民主黨合作。但係民主黨一直都唔贊同呢個做法，所以民主阿婆亂咁建議，其實都係唔可行嘅。