政情：立會議案似影印重複

其實有留意立法會消息嘅應該發覺，議員近年提出嘅議案基本上大同小異，來來去去都係同扶貧、社福政策同樓市等有關嘅議案，重複又重複。翻查資料，立法會由上個立法年度開始至今，已討論咗大大話話廿幾個同扶貧及社會福利政策有關嘅議案；至於同樣備受關注嘅樓市、置業同教育政策等議案，都講咗五次咁多，重複又重複。

議案相似，發言內容自然難免類近，呢個情況好易令人誤會香港呢個國際城市係咪真係冇其他議題要討論，唔少熟悉議會運作嘅政界人士慨嘆，近年議員提出嘅議案辯論，的確冇以前咁多元化同有創意，唔知人稱「人肉錄音機」嘅政制及內地事務局局長林瑞麟，見到呢個情況會唔會偷偷咁笑呢？

政府當投訴耳邊風

唔可以怪晒班議員，試問政府如果唔係講極唔聽、議員又點會重複又重複提出類似議案呀！否則選民唔投訴，議員自己都悶啦。除咗扶貧呢類議題，我哋亦發現議員們對環保同空氣質素等議題嘅關注似乎多咗，呢個算係值得一讚。

雖然有人唔滿意議案嘅內容太相似，認為討論唔夠深度同宏觀，但重複提出嘅議案，有人覺得都有價值喎。我哋就呢個現象問過中大政治與行政學系高級導師蔡子強，佢覺得呢個現象都無可厚非，因為議案辯論的確可以令一啲政策由冇講到有，好似最低工資咁，所以，雖然議案冇法律效力，都值得討論嘅。

姑勿論點都好，立法會議案辯論變成「影印機加錄影帶」呢個情況已經係不爭事實，相信包括議員在內都求神拜佛希望政府打開耳仔，盡快落實一啲市民關心嘅政策。不過呢個機會都幾渺茫，所以喺可見將來，議案重複呢個問題都唔會有機會解決囉。