政情：連戰被邀任國家副主席？

連戰五年前展開和平之旅，曾踏足北京，見過國家領導人，從此成為兩岸關係嘅指標人物，但最新一期香港鏡報月刊報道，北京有意搵連戰做國家副主席，消息實在太震撼，又無明確載明消息來源，國民黨發言人蘇俊賓連點回應都傷腦筋，話呢個係一個「無厘頭」嘅資訊，佢唔知道點回應。

陸委會副主委高長就指，無辦法查證消息屬實與否，但若果連戰真係到北京做官就係觸犯兩岸人民關係條例，係絕對唔可以嘅。

連戰兒子連勝文早前喺五都選舉中為國民黨候選人拉票時遭槍擊，外界或關心、或質疑，相信連家已心煩不已，依家仲意外被扯到敏感嘅兩岸政治，所以，連戰辦公室尋日回應北京想搵連戰做國家副主席嘅消息時，都有啲哭笑不得，笑稱唔可能發生，不予置評。