中環出更：曾智明識食識煮客家菜
一連四日嘅客家文化節尋日揭幕，同時舉行客家文化展覽同揭幕酒會，多個客家商會同團體都有代表出席，陣容鼎盛，除咗有中聯辦副主任黎桂康，仲有前全國人大常委曾憲梓同公子香港嘉應商會會長曾智明（Ricky）、鄉議局主席劉皇發，仲有半個客家人嘅前民政事務局局長何志平（肥平），咁熱鬧，點少得卓妮！
鍾情釀豆腐炆豬肉
Ricky係文化節籌委會骨幹成員，尋日忙到滿場飛，不過講到客家菜，Ricky幾忙都要停低同大家分享吓。唔講唔知，Ricky原來對客家菜情有獨鍾，唔止識得食，間中仲會落手落腳煮番幾味。Ricky同爸爸曾憲梓一樣，鍾意食釀豆腐同炆豬肉；至於邊款先係拿手小菜，Ricky就笑笑口唔肯透露，話總之好多味都識煮啦，得閒就會煮畀屋企人食，仲一口應承夾個日子，等卓妮可以試吓佢嘅手勢添！
發叔就話，食客家菜等同飲水思源，最愛釀涼瓜同滑豆腐，但平時應酬太多，好難餐餐都食客家菜，所以一有機會就會食多啲。肥平雖然唔識講客家話，但對食就好有研究，最鍾意鹽焗雞，但佢怕畀人話變相宣傳，點都唔肯講平時幫襯開邊間客家菜館。