中環出更：朱經武重臨香江
香港工程師學會尋晚喺會展歡賀三十五周年，並首次表揚二十三位業界翹楚，政商界同工程界賓客逼爆酒會現場，恭喜聲此起彼落。卓妮都去沾吓喜氣，最驚喜係見到一年前退休離港嘅前科技大學校長、超導體大師朱經武。原來今次係呢位多次成為全港最受歡迎嘅大學校長首次重返香江，佢一現身就引起哄動，好多人過來同佢寒暄，場面溫馨熱鬧。
工程界翹楚喜相逢
朱經武係受到表揚嘅工程界翹楚之一，佢卸下科大校長職務後，重返美國休士頓大學任教，呢幾日咁啱以顧問身份參加台灣行政院科技組會議，所以尋日抽空由台北飛嚟香港領獎，今日又返台繼續開會。朱經武話，香港好多基建係工程師嘅功勞，所以值得表揚，但佢謙稱自己係沾光啫。
其他獲此殊榮者仲有當年以「電筒大王」聞名業界嘅前行會召集人鍾士元、水利工程專家兼港大專業進修學院院長李焯芬、全國政協委員兼金城營造老闆王國強（KK）、工程界立法會議員何鍾泰等，佢哋都親自現身領獎，但未克前來攞獎，有諾貝爾物理學獎得主高錕、港鐵行政總裁周松崗、前上海市長徐匡迪等人。
卓妮所見，工程界人士對大Sir好敬重，事關三十幾年前佢做當時嘅立法局首席議員時，引入法例確立咗香港工程師學會嘅法律地位，先至有學會嘅誕生，難怪後生晚輩對佢咁尊重，盡顯江湖地位。
KK嘅太太就帶埋三個子女撐場，令人羨慕。卓妮見佢戴咗條印滿「KK」字樣嘅深紅色領呔，以為佢貪靚搵人度身訂造，點知原來係佢私人裁縫偶然見到條布滿KK字樣嘅Giorgiani靚呔，買嚟送畀佢。KK有咁知心嘅朋友，家庭又幸福美滿，難怪成晚笑不停。
李焯芬同岩土工程師黃景強一見面就攬頭攬頸，兩人係港大同班同學，依家又一齊獲得表揚，連李焯芬都笑笑口稱大家係四十幾年嘅難兄難弟。
工程師學會會長朱沛坤話，今年第一次向二十三位工程界翹楚致意，表揚佢哋對社會嘅貢獻，並將佢哋嘅工作點滴結集成書，節錄詩聖杜甫於《春夜喜雨》中嘅詩句「潤物無聲」作為書名，以彰顯工程師藉工程專業滋潤萬物以改善人類生活、默默耕耘嘅精神，佢希望將來可以繼續辦落去。
卓妮