中環出更：郭李天穎姚珏攜手行善
俗語有云：「近水樓台先得月。」不過用喺曾經做過隔籬鄰舍嘅新地非執董郭炳湘太太李天穎（Wendy）同著名小提琴家姚珏身上，得嘅卻係愛心。事關Wendy擔任名譽贊助人暨主席嘅「生命熱線」，將喺聖誕期間舉行嘅「姚珏All About Love全為愛音樂會」中，用其中一場舉行慈善專場，扣除開支後，其餘將捐畀「生命熱線」提供預防自殺服務，姚珏仲會將今次用嘅小提琴捐出嚟拍賣。
割愛拍賣「老拍檔」
小提琴可以話係演奏家嘅最佳拍擋，姚珏今次捐出嚟嘅，仲係跟咗佢十幾年嘅老拍擋，大家一齊去過好多地方演出；姚珏割愛捐琴，絕對係善心無限。
今次音樂會以「愛」為主題，會將荷里活電影中嘅經典樂章重新編曲；至於慈善專場，就會喺十二月廿六日boxing day舉行，所以「生命熱線」推出「聖誕同樂獻關愛」行動，呼籲企業捐款支持預防自殺工作，購買音樂門券做聖誕禮物鼓勵員工。咁有心思，難怪Wendy都話係「good idea」，仲響應買飛請員工睇騷添。