政情：阿涂新婚得鹿茸補身
「人逢喜事精神爽」，呢句話用喺新婚差唔多一年嘅立法會議員涂謹申身上就最適合不過。阿涂尋日出席一個婚宴活動，大談新婚感受，大會仲送咗支珍貴嘅鹿茸畀佢補身。阿涂去年十二月十二日十二時十二分迎娶咗做公關嘅第二任太太蘇麗芬，話咁快轉眼就一年，阿涂成個人都唔同晒：「好多人話我個人精神咗，塊面都冇以前咁黑！」
談起太太，阿涂甜上心頭。佢話太太以前做記者，特別明白佢工作嘅苦與樂，可以互相鼓勵：「好多嘢佢一講就明，就算未講佢都會自動睇電視，仲會評論吓我講嘅嘢添！」不過大家都係大忙人，點樣分配時間見面呢？佢話惟有寓拍拖於工作，好似之前參加「鼠戰中環」活動，咁蹺太太就係大會公關，咪可以成日見面囉！
再次組織家庭之餘，阿涂仲透露第二次做業主，今年八月啱啱買咗樓。雖然樓市高企，但佢話一個穩定嘅家對女人好重要，所以貴啲都唔介意。估唔到平時一本正經嘅阿涂，原來係廿四孝老公，唔知佢幾時做埋廿四孝老竇呢？