有說廿一世紀嘅戰場在法庭，呢句話有幾真，睇吓立法會嘅情況就知道。律師會最新嘅會員通訊顯示，立法會秘書處正籌備新一份律師行備用名單，專門就立法會要面對嘅司法覆核、工程招標等問題提供法律意見，歡迎有興趣嘅律師行先向秘書處登記同提交如收費等資料，方便立法會有需要時即刻搵人。立法會嚟緊兩年好可能面對多宗官司，秘書處未雨綢繆實冇錯。
今屆立法會處於多事之秋，要處理嘅事務，單單可變成對簿公堂嘅計時炸彈。好似前房屋及規劃地政局常秘梁展文離職後獲批入主新世界中國，相關委員會下星期會出報告，但政圈早已盛傳梁展文會喺報告公布後提出司法覆核，到時立法會嘅律師行名單就會大派用場。
此外，立法會十月通過廢除擴建堆填區法令，政府好有可能提出司法覆核，挑戰立法會權力，成為首宗立法會同政府開戰個案。而調查雷曼爆煲嘅委員會亦隨時出事，事關雷曼小組揀咗六間銀行嚟審，牽涉無數銀行高層同前線員工，只要其中一個覺得冇理由畀立法會照肺，都有機會再掀起一連串訴訟，總之麻煩事多籮籮，搵定律師絕對唔係杞人憂天。