中環出更：包陪慶母子辦學拍住上
幾難嘅夢想都敵唔過有心人嘅毅力，一直夢想要喺中國土地上建辦世界一流中國學校嘅中國船王包玉剛長女包陪慶，同仔仔蘇文駿（Philip）○七年喺上海創立嘅包玉剛實驗學校，下年將會增設寄宿制中學部，實行一條龍全人教育。Philip笑言依家嘅人工比佢讀大學做實習生嘅時候仲要低，不過可以同媽咪一齊完成夢想，佢又點會say no。
蘇文駿體會寄宿好處
Philip八歲就開始接受寄宿教育，喺英國伊頓公學就讀嘅時候，獲得雙獎學金，升讀牛津大學又獲首席秀才生榮譽，係全英國五位最優秀學生之一。讀書之外，運動佢亦耍家，仲曾經代表香港參加國際泳賽。張「成績表」咁靚仔，難怪佢深深體會到寄宿教育嘅好處，仲要將世界各地領先學術機構嘅教育思想同自己經驗帶入學校。
Philip話媽咪對佢只有兩個要求，就係學好普通話同做個好人。佢話當年去英國讀書，學校無普通話班，媽咪喺北京請老師過去教，結果連帶其他同學都得益，所以佢自少就好認同媽咪嘅教育夢行得通。
卓妮