政情：田二少拍葉劉火星撞地球
物理定律，同性相拒，強硬嘅田北辰碰上剛烈嘅葉劉淑儀，有乜結果？消息話，出走自由黨嘅田二少，已正式接觸正籌組新黨嘅匯賢智庫主席葉太，密斟加盟，兩個星期內有定奪。不過，政界一般唔睇好呢對新組合，指田二少周身棱角，葉太就強人作風，二人嘅性格同樣係自視甚高，不甘人下；若然真係走埋一齊，唔止擦出火花，隨時火星撞地球，撞到一舊舊！
早前傳出田二少有意加盟葉太嘅新政黨，外界都半信半疑，質疑以田二少不甘受制於人嘅性格，點肯放低嗰種傲氣，「入贅」葉黨？所以，大家都唔睇好田二少呢段從政生涯第二春。不過，事態近日有新發展，尋日有消息傳出，田二少唔介意做新黨阿二，所以雙方已進行正式接觸。
已正式接觸 短期內定奪
知情人士話，如果田二少嘅從政目標係要做阿一，就會揀繼續留喺自由黨，等到二○一二年立法會直選，一旦喺新界西勝出，就可以統領自由黨；依家佢寧願退黨，就唔會計較名分，「最緊要大家有傾有講」。且不談田二少一旦留喺自由黨，最後有無機會做阿一，田二少欣賞葉太政治立場唔會左搖右擺確係事實。了解田二少嘅人話，佢好欣賞葉太喺舊樓「強拍」一役中，明知反對「強拍」可能會失選票，佢都堅持到底，所以退出自由黨近兩星期嘅佢，已正式接觸葉太，商討加盟新黨嘅可能性，十日、八日內就會有定奪。
田二少為組黨唔介意改名叫田阿二，葉太組黨又物色緊副主席人選。一個漏夜趕直選科場，荒村陌路急於尋找出路，一個組黨啟程在即，響號召集同路人上車。照目前形勢睇，田二少搭上葉太呢趟組黨順風車，唔係無可能。只不過，田二少同葉太作風都咁剛烈，即使二人行埋，日後會唔會又「因了解而分開」？又會唔會好似好多火爆新人咁，二人為派喜帖、請賓客一類瑣事爭論不休，最終未行禮已分離？依家政界都擔定櫈仔，等睇好戲。
葉太尋日接受我哋查詢時證實的確同田二少傾緊加盟嘅事，但成事與否，葉太賣關子，稱正在進展之中，未有定案，亦唔肯透露有否拉攏其他功能界別議員加盟。