政情：楊哲安Sell環保踩單車返工
本港運動員喺亞運勇奪八金，民政事務局局長曾德成只識借金牌硬銷申亞，反而教育局政治助理楊哲安（Jeremy）就有另一番體會。Jeremy尋日自爆見到單車健兒奪標後，激起佢決定踩單車返工嘅念頭，為環保出分綿力。Jeremy更特地帶埋佢架「戰車」到場，即席喺台上演兩手。
Jeremy尋日出席一個名為「綠色救地球」活動，同在場中小學生分享環保心得。近期開始實行「單車大計」嘅Jeremy話，目標係一年減用一百公升油，為咗呢個「創舉」，佢專程喺網上計劃好路程，仲放多幾件西裝喺公司，等佢可以着運動裝返工再換衫。
放工坐汽車
Jeremy話自己唔係黃金寶，放工回程時要上斜，如果踩單車，分分鐘返唔到屋企，所以特登買部摺疊式單車，等放工時可以「棄單車坐汽車」喎。
Jeremy仲硬銷踩單車好處多，至少喺佢同事如夢初醒地開早會時，佢已經進入狀態。
不過香港嘅單車徑未臻完善，但希望小朋友可以好似佢咁，喺自己能力範圍內盡力做多啲。且看佢係咪三分鐘熱度啦！