中環出更：十大傑青 謝安琪低調攞獎

肥亨打絲巾煲呔撐場

頒獎禮尋晚喺會展低調進行，六點半舉行酒會，七點半晚宴開始入席，八點半開始頒獎。不過，謝安琪八點左右至現身，到場後透過大會話不接受訪問，好似頒獎禮咁低調進行。

不過，尋晚嘅場面依然星光熠熠，好多名人評審及提名人撐場。好以評審肥亨咁，尋晚男士嘅dress code一律戴黑呔，佢好花心思，戴咗一個好似絲巾嘅新潮煲呔到場。無官一身輕嘅佢，習慣咗無「呔」一身輕，但尋晚以傑青評審身份出席，唔打唔得，畀足面大會。問佢做評審辛唔辛苦，肥亨笑謂，今次用咗足足一日去同十幾位入圍者溝通，最終選十個出嚟，一啲都唔馬虎㗎！

另一評審陳茂波就話，自己評審時除咗睇「現時」外，亦睇「將來」。好似得獎嘅乒乓孖寶李靜同高禮澤咁，以往掛住為香港爭光，冇乜時間做社會服務，但兩位話將來一定會回饋社會，所以選咗佢哋。

李靜同高禮澤參加完亞運，特登趕返香港出席頒獎禮，不過佢哋嘅提名人霍震霆係港協暨奧委會會長，尋晚要出席亞運閉幕禮，所以甩唔到身。乒乓孖寶都話，以前十年黃金歲月掛住爭獎牌，依家希望畀多啲機會年輕一代嘅運動員，自己就抽多啲時間做社會服務，好似教小朋友打波咁，將技術傳畀下一代。

行政會議成員兼安老事務委員會主席梁智鴻今次提名咗搞安老慈善服務嘅「長者家」創辦人黃卓健。金刀梁話，自己同黃卓健一拍即合，覺得對方年輕有為，最重要係對老人家有心，好難得咁話。

謝安琪喺爭議聲中做傑青，尋晚低調出席頒獎禮。 （霍振鋒攝）	梁智鴻（右）係黃卓健嘅提名人，佢話大家都係做長者服務，一拍即合。	廖秀冬（左）衝口而出話唔知邱騰華做成點，盧思騁（右）拿拿臨幫佢打圓場。
馬時亨打咗個新潮煲呔出席，有型有款！	提名人霍震霆為亞運甩唔到身，李靜（右）同高禮澤（左）一樣高興。

冬冬唔知邱騰華做乜

前環境運輸及工務局局長廖秀冬今次提名咗同樣做環保工作嘅全球氣候行動聯盟中國項目統籌盧思騁。冬冬近年專注喺內地搞環保，唔知佢覺得環境局局長邱騰華做成點呢？點知冬冬衝口而出話：「我唔知佢做緊咩喎！」盧思騁聽完即時幫手打圓場，話冬冬好少留港，真係冇留意喎，果然好有默契！

卓妮