政情：曾德成申亞垂死掙扎

申亞諮詢仲有兩日就完，港隊嘅破紀錄佳績似乎未能令民意逆轉，但民政事務局局長曾德成仲未肯死心，尋日又再次撰文曲線撐申亞。佢喺文章結尾前非常強調話，香港運動員視廣州係半個主場，成為今次獎牌大豐收不可忽視嘅因素之一。言下之意即係話，如果運動員喺主場比賽，就會攞晒啲金牌喇，又係擺咗運動員上枱。其實勉強無幸福，香港搞極都無申亞嘅氣氛，擺邊個上枱都冇用㗎。