政情：莎姐明幫暗砌田二少

自由黨風雨滿途，尋日下午喺九龍灣總部開集思會，田少、莎姐、主席劉健儀（Miriam）同地區骨幹共十八人出席，中場叫「麥記」漢堡包外賣醫肚，夠晒平民化。全面復出嘅田少，強調自由黨開拓地區嘅路線不變，下星期五同莎姐落四區支部穩軍心，但唔評論對胞弟田二少退黨嘅心情。Miriam就話，該黨未見退黨潮，但對田二少退黨不無怨言，指二少一向負責地區發展，突然出走，殘局有排執。

若出選新西 唔派人對撼

提起田二少，自由黨中人百感交集。莎姐尋日上午喺大氣電波直言，自由黨同田二少仍係朋友，若然田二少出選新界西，自由黨「唔會派人對撼」，而莎姐自己亦「暫時無打算」再蹚直選渾水，反而唔排除田少選新界東、Miriam轉戰直選。

自由黨對田二少嘅愛恨關係，一直掩掩映映，尋日莎姐終於開啞謎，點樣反枱都好，話晒田二少係田少胞弟，以前莎姐喺新西經營開嘅地盤同樁腳，「自動轉帳」畀田二少，呢個遠房親戚，總好過益民建聯同工聯會呢啲名義盟友，呢啲就係政治無永遠嘅朋友或敵人，只有永遠嘅利益嘞！

加劇黨內分裂 寸到出面

自由黨高層有意喺直選上扶持田二少，但對田二少喺大家樂扣飯鐘錢事件上「中間偏左」，導致黨內分裂加劇，則毫不客氣，全盤否定。莎姐強調，自由黨係一個比較溫和嘅政黨，好多黨員唔認同田二少嘅罷食大家樂行動，「唔可以簡化式話人係無良僱主，我就係好人，咁係咪解決矛盾嘅辦法呢？如果你要博取掌聲，咁可能係嘅。」明寸田二少扮好人、博掌聲。

自由黨提出直選同功能界別「兩條腿走路」方針，行咗咁多年，左拐右拐，舉步維艱，估唔到依家處理田二少，又扶又砌，大大發揮「兩條腿走路」精神，世事何其玄妙！