政情：賭王行善 257萬投得白松露菌
一年一度嘅意大利白松露國際慈善拍賣會，周六晚上又喺澳門透過衞星全球競投，代賭王何鴻燊出戰嘅四太梁安琪，以二百五十七萬港元投得兩顆共重一千三百幾克重嘅珍貴白松露菌，連續第四年成功保衞珍品唔落入外國人口中。四太笑不攏嘴咁話，遲啲會安排白松露宴同一眾好友飽餐一頓。
撼贏兩競投對手
今次拍賣會喺賭王旗下嘅新葡京酒店三樓意大利餐廳Don Alfonso 1890舉行，此店由米芝蓮兩星大廚Alfonso Iaccarino主持。拍賣喺倫敦、羅馬同埋澳門同步進行，志在必得嘅四太最終以三十三萬美元（約二百五十七萬港元），撼贏來自另外兩個城市以網上競投嘅競爭者，成功投得兩顆分別重九百克及四百克嘅白松露菌。
四太好開心咁話，當晚賭王已經上床瞓覺，所以尋日至話畀佢聽呢個喜訊。
四太又話：「為善最樂，做善事就算幾多錢都值得啦！」事關今次嘅收入將會悉數捐贈澳門嘅慈善機構。