中環出更：陳南祿請飲暖笠笠維他奶

Philip請客，羅友禮夫婦畀面出席，美國銀行嘅banker都係座上客之一。維他奶出品賣到街知巷聞，估唔到嚟到馬場都有粉絲，席間有人提議想飲維他奶，Philip拿拿臨叫人預備，仲指定要將奶加熱，賓客一邊飲住熱烘烘維他奶，一邊賞馬，暖在心頭。

原來Philip自細鍾意飲維他奶，不過當年買一支都唔平，佢笑言只可以間唔中飲吓，以Philip今時今日嘅身價，買幾十箱返屋企都話咁易嘞。

數維他奶頭號粉絲，非羅友禮莫屬，佢自爆飲足六十八年，最愛係原味維他奶，尋日見賓客咁捧場，笑到四萬咁口。

陳衍里利子厚夾份養馬

馬場尋日仲有一位稀客，佢就係皮膚科專科醫生陳衍里（Henry），Henry唔聲唔聲做咗馬主，同馬會大董利子厚夾份養咗匹「擦出火」，尋日新馬登場，兩個大男人齊上陣做啦啦隊，仲要求騎師着上灰白色戰衣求好運。細問之下，原來灰色係利子厚喜歡嘅顏色，而白色就係Henry嘅「飛佛」，可惜「擦出火」最後未能勝出。

陳衍里醫生（右）翹埋雙手觀戰，甫士有型過人，身旁嘅利子厚（左）就用馬簿遮蔭，二人同樣緊張。

利子厚新馬「擦出火」嘅騎師穿上灰白色綵衣。

卓妮