中環出更：丹麥王子靚樹訪港迎聖誕
丹麥祖謙王子（HRH Prince Joachim）早幾日嚟香港出席珠寶展覽，原來佢仲帶埋王子花園一百棵聖誕樹登陸香港，進駐金鐘一個大型商場，實行同香港人一齊歡度聖誕，祖謙王子親自介紹，話呢一百棵聖誕樹依照丹麥環保法例栽種，當中無任何森林被傷害，王子仲會抽時間同職員一齊研究點樣種到棵樹又高又靚。
綠中帶藍有閃爍銀光
呢一百棵聖誕樹最高有成八米，品種係被譽為聖誕樹「勞斯萊斯」嘅高加索冷杉（Nordman Fir），係品質最好嘅聖誕樹，色澤綠中帶藍，帶有點點閃爍銀光，王子嘅大宅入面，都有無數同樣嘅聖誕樹。
難得重臨香江，前妻係港產王妃文雅麗嘅祖謙王子當然要趁機四處遊覽，王子大讚香港係一個好地方，匯聚咗唔同文化，又係一個不夜城。王子又話，香港有好多新奇嘅事物，美食又多，佢尤其鍾意食點心同四川辛辣小菜，睇嚟佢都夠晒識食喎。
卓妮