政情：張學明證發叔棄村選
村代表選舉提名期今日結束，屯門龍鼓灘村原居民代表參選人到尋日依然只得兩個，未見鄉議局主席劉皇發報名競逐連任。繼前日發叔公開話「適當時候做適當嘅嘢」、「慢慢自有分曉」後，鄉議局副主席張學明前日離開立法會時都大開金口，暗示發叔唔會落場同人爭做原居民代表，好大機會讓畀其他人去做。
張學明話，發叔做咗五十年村長，條村咁多年都無人競爭，發叔咪當義工去做囉。咁係咪發叔咁多年都捱義氣做村代表呀？學明就笑笑口無回應，但就透露，話發叔做咗咁多年村代表，一直無競爭先至去做，如果今次有人參選競爭，咪讓畀其他人去做囉。佢仲同發叔一樣賣關子，話今日截止報名後，一切自有分曉。
學明早前因為心臟有兩條血管栓塞要入院通波仔，經過休養後復出，但飲食就比以前小心好多。好似今年大閘蟹季節，學明就話唔敢再食，避免膽固醇積聚塞住血管，盡量保持身體健康。不過，下月初林村許願廣場會舉行客家炆豬肉大賽，身為客家人嘅學明又能否抵受炆豬肉嘅美味誘惑呢？