政情：帳委會白鴿變塘邊鶴
全港直資學校帳目愈查愈混帳，除咗一班家長激心，民主黨核心兼立法會教育界代表張文光都愈睇愈嬲，尋日力數教育局管理失當，混帳程度令人不能接受。張文㷫到咁，睇嚟下星期政府帳目委員會做公開聆訊時，一定會為家長出番口氣啦。點知張文聽到後一臉尷尬，原來經歷政改一役，民主黨唯一一個帳委會代表鄭家富已經退黨，令堂堂泛民第一大黨變做塘邊鶴，真係唔知點同選民交代。
帳委會係立法會其中一個常設委員會，泛民同建制雙方都有不成文協議，每屆立法會開始前協商好邊個入局，令各黨派都有代表，一做四年。○八年民主黨就推舉阿富入去，不過當時點都估唔到佢會退黨，所以依家no say都冇辦法。既然民主黨冇份審，張文話惟有列席聆訊，但就要忍口，因為除帳委會委員外，其他議員都唔可以提問。
其實一向都有非帳委會議員委託委員提問，張文都可以向阿富埋手吖，退黨也是朋友嗎。不過張文話，既然阿富已經話自己係獨立議員，就無謂打搞人，做隻安靜嘅塘邊鶴算喎。