政情：KK憶述北韓行船見聞
南、北韓兩國大前日爆發激烈炮戰，互轟約二百枚炮彈，令各國震驚。不過工聯會立法會議員黃國健（KK）就洞悉形勢，話覺得北韓只係「發窮惡」，想爭取多啲國際援助，加上有中國同美國居中斡旋，相信南、北韓唔會真係掀起戰幔。
講開先知，KK原來廿幾年前行船時去過北韓，當時嘅北韓比起依家更封閉，外人好難一睹其廬山真面目。KK話嗰陣覺得北韓好落後，好多日用品都好缺乏，永遠買唔到嘢，不過街道井井有條，一舊垃圾都冇。好笑嘅係，當時喺市面見到包裝得靚啲嘅商品，全部係非賣品，睇得唔買得，搞到KK最後乜都買唔到，惟有食飯醫肚就算。
雖然南北韓關係緊張，但港府始終未就兩國發出任何旅遊警示，民主黨副主席劉慧卿亦一於冇有怕，照原訂計劃星期日飛去南韓首爾出席國際婦女會議。咁卿姐有冇買重保險、以防萬一先？點知一向精明嘅佢竟然糊塗一時，話完全醒唔起要買保險，會即刻補買咁話。