中環出更：猛人齊出力為工業家省招牌
由工業總會主辦嘅二○一○年「香港傑出工業家獎」尋晚揭盅，玩具公司開達集團主席丁午壽（Kenneth）攞獎，英納格錶太子爺高鼎國就獲頒「香港青年工業家獎」。工業之路甚艱難，有抱負者買少見少。工業總會副主席鍾志平提名Kenneth，鐘錶大王孫秉樞就提名高鼎國，名人齊發功，為工業家省招牌。
Kenneth攞獎，太太一支箭飆上前恭喜佢，雖然未見囝囝丁天立到賀，但Kenneth老友多，掌聲不絕。攞獎係開心事，但Kenneth就把握機會不平則鳴，批評最低工資立法幫唔到低下階層，年紀大嘅弱勢社群反而因此失去競爭力。
丁午壽同政府唱對台
回首過去，佢話香港向來有自然調節機制，工資彈性大，即使面對亞洲金融風暴、沙士疫症等衝擊，仍然屹立不倒。失去彈性後，真係令佢擔心。Kenneth攞獎之餘，不忘同政府唱吓對台戲，果然夠膽識！慧眼識英雄提名佢攞獎嘅，就係工總副主席鍾志平嘞。
得獎名單中仲有一位後起之秀，就係英納格錶第三代接班人高鼎國。提名人孫秉樞同高家淵源深，高嘅公公李惠莉同孫生係莫逆之交。李惠莉後來將鐘錶生意交畀女婿、即係高鼎國爸爸高叔平打理，轉眼輪到第三代高鼎國掌舵。高鼎國後生有為，一手將品牌年輕化，生意額仲喺五年內勁升十倍，認真叻仔。佢都係嗰句，提高市場佔有率，係佢最大目標。講到最低工資，高鼎國話對佢哋影響不大，皆因佢哋做嘅係高增值產品，人工都高過最低工資，好多產品仲喺瑞士製造添。
頒獎禮上，行會成員楊敏德、金山集團主席羅仲榮、偉易達主席兼行政總裁黃子欣都獲頒獎狀，佢哋亦曾獲頒「傑出工業家獎」，稱得上是金牌前輩。工總照顧到老中青三代，都算細心囉。
卓妮