政情：發叔談退選續賣關子

直至尋日為止，報咗名爭奪龍鼓灘村原居民代表嘅，只有兩位劉姓原居民，不過兩位都唔係發叔。發叔盤據龍鼓灘逾半個世紀，一旦佢真係退出，消息絕對震撼。不過尋日發叔被問到係咪退出村選，只係邊行邊話咁答：「慢慢自有分曉㗎啦！」

大家當然唔收貨，於是再追問發叔係咪真係退選。發叔就笑笑口話：「適當嘅時候做適當嘅嘢！」咁咪覺得係時候退下火線呢？惜字如金嘅發叔，只係再重申一遍，適當時候做適當的事，然後就步入升降機離開。不過村代表本周五（廿六日）截止，發叔係咪棄選，最遲本周五就會揭盅。