政情：方剛捲扣飯錢糾紛

有分店職員同本報投訴，話集團舊年向全體員工發咗份通告，講明每逢員工加班超過兩個鐘，就會享有三十五蚊飯錢，仲係現金添。不過，就喺上個月初，集團喺中環分店搞花生騷，廿幾個員工連續兩日加班超過兩個鐘，但到今時今日都仲未畀番飯錢啲員工，問過店舖經理竟然話今次無得畀，搞到啲員工鬼咁㷫，仲話「老細係立法會議員，佢不嬲都孤寒，估唔到連呢少少錢都要慳！」擺明係話緊方剛啦。

但係集團人事部接受查詢嘅時候就好強調一直無取消加班有飯錢嘅安排，仲話啱啱上個月尾都有出加班飯錢畀啲員工，相信今次係一場誤會，會同分店經理了解情況咁話。大家樂事件前車可鑑，方剛睇嚟要實班下屬做嘢，否則就會好似陳裕光咁招人話柄就唔好啦。