政情：田二少複製陰招淡化退黨

政府尋日下晝兩點半發出採訪通知，預告財爺鬍鬚曾會喺下晝四點半開記招公布壓抑炒樓措施。咁啱得咁蹺，自由黨又喺差不多時間發稿，通知傳媒會喺四時四十五分開記招，交代田二少退黨一事。兩個記者會時間只差十五分鐘，未必所有傳媒去得晒兩邊採訪；即使去到，唔使諗傳媒都會重點報道壓抑炒樓措施，加上金管局總裁陳德霖緊接財爺出嚟公布調低樓宇按揭成數，田二少退黨新聞自然沉底。

惹火消息 疲勞轟炸傳媒

呢招臭屎密冚陰招，其實緣自新聞處處長黃偉綸。早喺八月十三日星期五，政府為掩飾副局政助表現不濟而竟然只係凍薪嘅消息，一日內連環公布其他四項重要消息，其中一項又係壓抑樓市過熱措施，仲有委任左右香港電台命運嘅港台顧問委員會組成，單單惹火，簡直係疲勞轟炸傳媒，大家都視之為「黑色星期五」，翌日傳媒報道副局政助凍薪單嘢嘅版位有幾大，可想而知。

田二少所以退黨，除咗因為罷食大家樂事件成為導火線外，黨內骨幹成員一直不滿佢自以為是，多次毫不留情地公開批評黨友言論，傳聞張宇人以退黨以示抗議。如果大家記性好，應該仲記得當年田二少在任九鐵主席期間，同樣因為處事作風引發內訌，搞到「九鐵兵變」，前九鐵署理行政總裁黎文熹及一眾部門主管不滿田二少作風，與部屬晒馬逼宮，田二少最終辭職收場，黎文熹亦悻然離開。

深圳地震 暗有所指？

古時戰國時代發生「六月飛霜」，尋日田二少退黨，竟遇上深圳地震，震到來香港，莫非個天暗示自由黨地震？最離奇係，尋日立法會內務委員會內大部分議員都話感受唔到有震動，唯獨自由黨主席劉健儀事發時感覺到，佢話：「當時覺得震一震，自己就暈一暈，維持咗幾秒，仲以為自己精神唔係太集中添！」問佢係咪自由黨地震？佢哈哈笑咗兩聲話：「係發生咗啲事啫！」