政情：KK搞社企屢敗屢戰

民協呢條社企路都可謂相當崎嶇，做裝修「三行」初時，畀自己友官世亮穿櫃桶底，仲鬧到上法庭；按摩生意又因為牌照問題做唔嚟，最慘係連同清潔公司生意，統統都未回本。民協立法會議員馮檢基（KK）尋日大呻，政府淨係喺「伙伴倡自強」基金撥款畀佢哋創業並唔足夠，應該推出一啲相應政策，畀多啲生意社企做，佢哋先有生存嘅空間喎。

民協今次又喺「伙伴倡自強」基金申請到七十二萬元搞咖啡店，裝修使咗三十萬，計埋每月二萬一千元租金，每月要賣幾多杯咖啡先回到本，大家有數得計。不過阿基話度好晒橋，嚟緊會邀請中醫師同喺觀塘相當出名嘅小食食肆「蛇王標」嚟舖頭分享食療同烹調妙法，仲不排除自己落舖親自沖咖啡添。只係咁搞法，有點兒不倫不類咁啫。