中環出更：饒宗頤為敦煌奉獻「第一次」
國學大師饒宗頤德高望重，早前有五百位來自世界各地嘅名人學者遠赴敦煌，慶祝佢老人家九十五歲牛一，掀起一股保育敦煌石窟熱潮。當日來自香港嘅三十幾位團友，回港後迅即發起成立「香港敦煌之友」組織，籌款協助敦煌研究院保育敦煌石窟。組織尋日成立、舉行展覽及籌款晚會，擔任榮譽主席嘅饒老更首次捐贈十一幅書畫作品拍賣籌款，將自己嘅第一次獻畀敦煌。
「香港敦煌之友」陣容鼎盛，除咗饒老，仲請到基本法委員會副主任梁愛詩擔任名譽會長，創會會長就係有份參加敦煌賀壽團嘅港大專業進修學院院長李焯芬，成員有新世界中國實業項目董事總經理紀文鳳、李美賢、黃炳培等，前稅務局局長劉麥懿明就做司庫。組織早前已籌得五百多萬元，尋晚再喺灣仔君悅酒店舉行籌款晚會。
饒老好有號召力，名人齊撐場．包括中聯辦副主任黎桂康、發展局局長林鄭月娥、全國僑聯副主席陳有慶、甘肅省莫高窟敦煌研究院院長樊錦詩、太子珠寶鐘錶主席鄧鉅明、前高官葉澍堃、立法會議員林大輝及石禮謙等。鄧鉅明更捐出名錶供拍賣籌款。
十一幅書畫籌逾八百萬
李焯芬引述饒老話，一生人從未攞過自己嘅書畫出來拍賣，等於將「第一次」獻畀敦煌。饒老嘅「第一次」相當搶手，十一幅書畫共籌得八百六十萬元，鄧鉅明隻名錶就籌得三十八萬八千元，連買枱在內，全晚共籌得一千三百二十一萬元，所有善款供敦煌研究院用於敦煌石窟壁畫數碼化及保護維修工程等計劃。
紀文鳳話，敦煌共有四百九十二個較為完整嘅石窟，佢哋希望籌得一千四百萬元，先維修其中一百五十個石窟。佢話身邊有好多善心人，好似佢有個好恨去南美旅遊嘅朋友，將十萬元旅費全數捐出，搞到佢覺得唔好意思喎。
林鄭月娥上次帶埋囝囝跟紀文鳳一齊去敦煌，佢形容旅程只係走馬看「洞」（石窟），最深刻係樊錦詩教授為保育石窟獻出幾十年青春，而且經常同丈夫分開，所以有人話做局長辛苦，真係小巫見大巫。大輝就話當年同太太跟朋友上去參觀，喺沙漠食早餐，最難忘係騎駱駝，搞到太太好驚。
卓妮