中環耳目：梁君彥速食賀菊魚生飯
午市時間要喺中環搵間速戰速決嘅高級食肆，唔係件咁簡單嘅事，置地廣場地庫嘅賀菊（KIKU），就啱晒時刻同時間賽跑嘅政商界大忙人。經濟動力立法會議員梁君彥（Andrew）係賀菊嘅長期擁躉，仲對佢哋嘅「吞拿魚腩千色魚生飯」百吃不厭。
歎埋甜品唔使半小時
Andrew公職多多，日日東奔西跑，有時連食飯都好似打仗咁緊張。佢至愛日本菜，賀菊就成為佢食工作餐嘅首選之地，佢一坐低，連餐牌都唔使睇就點咗至愛嘅千色魚生飯，唔使半小時歎完餐飯，仲可以食埋個栗子雪糕至走人。成餐飯既有快餐店嘅速度，又有高級食肆嘅質素，難怪佢咁多年不離不棄。
千色魚生飯係賀菊勁受歡迎嘅招牌菜式，內含八款魚生，包括紅吞拿魚、三文魚籽、牡丹蝦、日本八爪魚同帶子等，仲有鮮美嘅鰻魚，款款都啱晒Andrew胃口。Andrew一向鍾意食魚生，貪佢健康、易消化、唔肥膩。原來佢以前打理家族紡織生意時，經常去日本買機器、材料，所以愛上咗食日本菜。