呢種人體器官加工而成嘅醫療產品，喺香港仲未可以合法買賣，所以有需要嘅病人如果唔想捱一刀，將自己腰骨嘅韌帶攞出嚟移植到膝蓋嘅患處，就只能去外國做手術，利用有心人死後捐出嘅十字韌帶。
怪醫梁家騮尋日出席立法會討論有關人體器官移植規例嘅會議，炮轟政府將條規例拖咗六年都未落實，搞到一啲外國已經普遍應用、含有人體器官嘅醫療產品未能引入香港。
佢即時踢爆，舊年有行會成員去外國滑雪整傷十字韌帶，因為香港冇得販賣含有屍體加工而成嘅十字韌帶，所以要去美國開刀做手術。怪醫事後唔肯透露邊個行會成員，仲笑笑口話係病人私隱。
CY尋晚出席一個聖誕亮燈活動，點都唔肯證實自己植入咗屍體十字韌帶，總之玩神秘，但又唔否認喇。