政情：華叔或缺席年宵籌款

維園年宵攤位尋日公開競投，華叔每年都會親身到場出手競投，不過因為健康問題，尋日惟有派出支聯會副主席李卓人做代表。李卓人用咗共四萬二千蚊投咗已投多年嘅一號同二號攤位，佢事後話原本諗住平過上年，點知反而貴咗一千七百蚊。

阿人話，華叔正在康復緊，到時會唔會現身幫市民寫揮春都仲未知，「佢當然好想寫，但我哋擔心佢去人多嘅地方會容易感染。」去年嘅年宵，華叔已經發現患上末期肺癌，但佢都堅持現身，就算一陣都好。阿人擔心如果華叔缺席，會影響市民嘅捐款數字，所以已經決定會賣劉曉波公仔同杯等精品，希望多啲市民捧場，幫補番啲捐款之餘，又支持埋釋放劉曉波。