政情：大輝浮誇體操似沖涼
立法會廠商會代表林大輝牽頭嘅C18（社區十八）尋日第一次落區搞活動，喺觀塘搞咗個「社區身心健康日」。雖然外間一直對C18嘅政治色彩議論紛紛，但大輝就一於少理。尋日個活動除咗有醫生談健康常識，仲請嚟食物及衞生局副局長梁卓偉一齊跳健康操，大輝玩得開心過啲街坊。
好似活動未開始，佢就撩人踢毽，踢到主持上台嗌開始先停，之後又跟住老師一齊跳健康操，由頭到腳都有招式，大輝心情勁靚，自得其樂，不過佢做啲招式相當有娛樂性，尤其係捽臉捽手嘅動作，簡直喺高潮位，好彩大會揀咗《數字歌》同范曉萱嘅《健康歌》做背景音樂，否則觀乎大輝嘅動作，恐怕會誤會當時係跳緊范曉萱嘅另一首名作《我愛洗澡》。
相比之下，梁卓偉就含蓄好多，加上梁副局有音樂底，所以節奏都跟得好足，動作又無大輝咁誇，跳得好斯文。大輝話自己嚟自社區，最鍾意一大班人玩，尤其是踢毽，事關以前屋企環境唔好，買個報紙造嘅毽一蚊都唔使，就夠成班細路踢幾次，所以今次咁好玩，令佢勾起不少童年回憶。