政情：季詩傑辭任黨秘書長
社民連嚟緊星期日將會舉行特別會員大會，商討由「維園阿哥」任亮憲等人提出嘅倒閣動議。距離特別會員大會唔夠幾日，秘書長季詩傑尋日突然宣布辭職，令特別會員大會再添變數。季詩傑尋日正式向社民連秘書處遞交辭職信，內容大致話近日社民連內部嘅風風雨雨令佢透唔到氣，佢收到風，一切紛爭都係衝住佢而嚟，佢諗成件事可能因為自己太直率，經常喺網上發表「不當」言論、又曾經用粗口鬧創黨主席黃毓民，結果搞到今日咁。
我哋尋日搵到當事人，季詩傑承認覺得因為係人事關係太複雜，令佢覺得好煩，雖然係咁，佢唔會因此退黨，因為自己同個黨嘅理念一致。問到佢如果倒閣失敗的話會唔會做番秘書長，季詩傑斬釘截鐵咁話「冇關係」，雖然佢唔覺得倒閣會成功。咁今次事件會唔會窒礙佢參選區議會嘅意欲呢？佢話：「由始至終，只要佢老哥（任亮憲）出聲，我都唔會同佢爭位。辭職同參選兩件事唔可以混為一談！」