中環出更：史立德愛駒出賽墨爾本盃
前仁愛堂主席史立德本身係好好先生外，其愛駒「好先生」一樣表現稱職，上兩個馬季贏咗三場頭馬，本月中仲遠征澳洲考菲爾德盃賽事，嚟緊下月二日再進軍澳洲最高榮譽嘅墨爾本盃賽事。前晚潮州商會慶祝一眾「架己冷」授勳，今年獲委任為太平紳士嘅史立德都有出席，佢話月底會拉大隊到澳洲墨爾本為愛駒打氣，希望為香港爭光。
史立德一講到愛駒出征澳洲就開懷大笑，佢話墨爾本盃賽事好出名，比賽當日已列為公眾假期，預計有十幾萬人入場，十足嘉年華一樣。為咗今次賽事，史立德使費超過一百萬元，包括馬匹運送、獸醫、練馬師等，加埋親戚朋友共十幾人嘅機票住宿，條數都幾襟計。據講廣東社團總會主席王國強及仁濟醫院顧問局委員嚴玉麟都會隨團湊熱鬧。
今次墨爾本盃賽事獎金高達六百萬澳元，約為四千五百萬港元，一旦時來運到跑贏咗，就認真和味嘞。