中環出更：羅富昌投資哈爾濱考耐性
到內地投資一啲都唔簡單，要有人事脈絡外，仲要適應營商文化差異。有「香港罐王」稱號嘅廠商會第一副會長羅富昌，尋日出席黑龍江書畫精品香港展覽時，就同我哋分享到黑龍江省會哈爾濱投資嘅心得。佢話旗下永富容器集團五年前將業務拓展到哈爾濱，睇中當地乳業嘅龐大發展潛力，主力生產奶粉罐，雖然生意好好，但訓練員工就好考耐性。
適應文化 訓練員工
羅富昌話，哈爾濱與廣東沿海兩地投資好唔同，廣東省好早對外開放，營商文化接近香港，但哈爾濱位處內陸偏遠寒冷地區，大部分人才都係國營企業培訓出嚟，營商思維及手法同南方好唔同，加上好少港人願意到當地打工，所以佢要適應當地文化外，仲要花好多耐性訓練當地員工，現時廠房聘請約二百五十人，要訓練晒都唔簡單。
羅富昌七八年喺大埔工業邨創辦美特容器廠，至今容器生意已遍布內地多個省市，包括江門、武漢、福州、大慶等，但佢最深刻係八四年到廣州黃埔開發區開設第一間容器製造廠，睇住大塊農田噴沙平整，由無到有；雖然間廠房已易手，但艱辛嘅開荒經歷令佢永世難忘。