政情：陳維安身教子女理財
當好多成年人都搞唔清咩係「入市」、咩係「樓市泡沫」嘅時候，原來新一代年輕人對呢啲財經概念經已瞭如指掌。滙豐銀行早前搞咗個少年財務策劃師大賽，參賽嘅高中生年紀輕輕已經識得如何理財，令作為頒獎嘉賓嘅教育局副局長陳維安（Kenneth）嘆為觀止之餘，更忍唔住感慨時代變遷。
今年四十五歲嘅Kenneth自爆廿年前剛剛踏入社會做事，先初嘗擁有第一張提款卡嘅滋味。佢話自己當年要處理嘅「財產種類」只得現金一種，基本理財知識亦喺大學、甚至係修讀碩士學位時先掌握到，今次驚見一班中學生你一言我一語，討論點樣將資金分配去獲取最大利益，不得不感嘆世界已經唔同晒。
Kenneth話，年輕人早啲學識理財係好事，但自己嘅大仔今年只得十三歲，學理財仲係太早。佢認為教子女理財最好係用「身教」，仲笑言自己同囝囝去買牙膏，都會趁機教佢點樣先買得其所喎！