政情：陳岳鵬開OT快餐醫肚
公眾人物對鏡頭都相當敏感，通常離遠見到記者舉起相機，已經諗定要避開定係以笑回禮，不過特首辦特別助理陳岳鵬（Ronald）就與別不同。尋日我哋喺街咁啱撞見佢，即使兜口兜面影埋佢相，佢都絲毫察覺唔到。有咩事令Ronald諗到咁入神呢？
話說我哋尋日喺中環置地廣場，見到Ronald眉頭深鎖咁，一個箭步行去太子大廈嘅「Canteen」買快餐醫肚，我哋跟住佢好耐，佢都未察覺。原來Ronald啱啱喺對面海開完會，打算拿拿臨返中環食個快餐，然後打道回特首辦做嘢，事關施政報告星期三就出籠，佢頭先諗到咁入神，都係因為諗緊施政報告有關嘅安排。
港府行咗每周五天工作已經有一段時間，Ronald星期六都要加班，仲要畀施政報告煩到魂不附體，真係可憐嘞。難得佢話對食冇乜要求，成日焗住要食快餐都冇所謂喎。