政情：張華峰分析形勢做大好友
港股重拾升勢，近日各路「股市明燈」又陸續登場。自嘲喺股災中成長嘅恒豐證券董事總經理張華峰，呢期做大好友，睇好股市同樓市升勢。佢尋日出席上海財經大學香港研究生教學點開幕禮時預測，保守估計年尾港股會升到二萬五千點，因為美元貶值，歐洲資金無出路，自然流入亞洲投資，特別係投資中國及香港股市，有助帶動兩地股市上升。
對於中港兩地樓市前景，張華峰都有一番見解。佢話全中國包括香港嘅適婚年齡人數每年遞增，好多人結婚後自然會置業安居，樓宇需求好大，所以兩地樓市會穩步上升，加上國家繼續努力刺激內需，相信未來發展勢頭相當好。不過，正如金管局前總裁任志剛尋日所言，目前金融市場出現百年一遇嘅亂況，市民都係小心管理投資風險為妙！