政情：吳文華勢必再坐一會
二○一二年底係新立法會大樓啟用嘅大日子，可惜一手促成新大樓落成嘅立法會秘書長吳文華（Pauline），明年已年屆六十歲退休年齡，名副其實係「有得做、無得用」。Pauline想留任見證baby誕生之心早已浮晒面，原來有啲立法會行政管理委員會成員都擔心新大樓啟用後，無Pauline壓場會出亂子，據聞佢哋已喺度諗緊計，名正言順畀Pauline再坐一會。
Pauline○八年尾接替馮載祥出任立會秘書長時已經五十七歲，照計做到明年就啱啱好約滿兼夠鐘退休。弊就弊在新立會大樓敲定二○一二年尾才啟用，眾所周知，新大樓由設計、裝潢、以至人手安排都由Pauline一手包辦，就儼如佢嘅baby一樣。早前立會修例廢除秘書處六十歲硬性退休年齡，就曾經被質疑有關修訂係為Pauline度身訂造，更將Pauline意欲留任之心表露無遺。
或以顧問形式聘用
神女有心，原來襄王亦有夢。據聞，有立法會行管會成員都覺得Pauline任內表現唔錯，擔心新大樓啟用後，多咗咁多新員工，新上台嘅秘書長未必壓得住陣腳，隨時搞出個大頭佛，所以有意畀Pauline繼續留任。不過亦有成員擔心咁做會影響接班問題，曾經提議吳文華交棒畀助理秘書長林鄭寶玲或者法律顧問馬耀添。可惜前者現時職級僅屬首長級第二級、即D2，有人覺得若然佢一下子升到D6實在太急；後者就被指做開法律顧問，貿然接任秘書長並不適合。
據悉，現時行管會提議畀Pauline續任一年，又或者喺約滿後改以顧問形式聘用，等佢可以掌舵處理新大樓嘅過渡安排，嚟緊行管會將開會討論，預計兩種安排都應該無人反對。種種因素睇嚟，Pauline最後極有可能再坐一會，見證新大樓搬遷後先功德圓滿退下來。