中環出更：伍穎梅蜜運轉潮Look
蜜運中嘅「九巴金公主」伍穎梅（Winnie）經常笑臉迎人，唔使問就知愛情湯水十足！上周四卓妮喺個慈善活動上見到換上秋裝嘅Winnie，佢手挽近年喺美國冒起嘅華裔設計師Alexander Wang同名品牌靚袋，個袋嘅底有成排鉚釘夠晒特別。佢話畀卓妮聽，個袋係朋友送嘅，咁係咪男友送㗎？Winnie話：「我有好多好朋友，個個都對我好好！」
愛上華裔鬼才設計
自從與中建企業董事許晉平拍拖嘅消息曝光後，Winnie愈來愈開心，心境應該都年輕好多。事關佢原本嘅打扮好正經，成個高級行政人員Look，但依家連「八十後」設計師Alexander Wang嘅搞作都成為佢嘅至愛。
喺美國出世嘅Alexander Wang，中文名王大仁，今年廿六歲。佢創立自家品牌時先至廿歲，係爆炸力驚人嘅設計鬼才。佢嘅設計源於紐約街頭文化，設計簡約時尚，深受明星名人追捧，被公認係紐約最紅最年輕嘅華裔設計師。