中環出更：換肝兩權威 樂做毅行者
范上達同盧寵茂兩位教授都係香港嘅換肝權威，原來佢哋唔只匿喺手術室埋頭做手術，仲好喜歡行山，多次參加樂施會舉辦嘅毅行者。盧教授今年第三次參加，范教授仲犀利，今年行第八次，而且都有好多難忘經驗，盧教授試過練習嗰陣，行行吓山收到醫院電話，話有人捐屍肝，拿拿聲要搵路出市區，好在趕得切。舊年經驗就令范教授最難忘，佢哋行山嗰日天氣特別凍，個個凍到騰騰震，想快啲行完，唔敢停低休息，終於打破佢最快嘅紀錄。
怕凍反破個人最快紀錄
盧教授有時都幾牙擦，成日以為自己每次換肝要喺手術室閒閒地企足十幾廿個鐘都頂得順，行山一定好容易，點知○四年第一次參賽練習時，着住牛仔褲同隊友練習，行到一半就腳軟，惟有乖乖地跟住隊友教嘅方法練習。
范教授二○○○年時發覺自己中年發福，肚腩大，於是同醫學會啲醫生向毅行者呢個高難度活動挑戰，呢十年嚟行咗七次，第一次要卅四個鐘行完，成績一次好過一次，舊年就快到廿六個半鐘行完。佢話，每次行到針山時，個個都攰到趴喺度，舊年天氣特別凍，個個凍到想快啲走，終於創下佢嗰隊嘅最快紀錄。又有一次，范教授試過行到腳痛，連手帶都剪埋準備離隊，點知等唔到的士離開，抖咗一陣，發覺對腳已經無乜事，就繼續行程。
樂施毅行者今年十一月十九日至廿一日舉行，由西貢北潭涌行到元朗大棠度假村，盧教授今年同囝囝「父子兵」上陣，加埋佢做牙醫嘅中學同學、囝囝嘅大學同學四人一隊，而盧太當然係支援隊嘅大隊長。范教授就搵埋瑪麗換肝隊伍嘅夏威醫生、已經私人執業嘅吳國際醫生同另一名醫生組隊參加。兩位教授同樣認為，毅行者唔只可以強身健體，仲可以培養換肝手術最需要嘅團隊精神，係好難得嘅經驗。
卓妮