政情：白鴿黨牛一 維園阿哥踩場贈「興」

致送「民主病夫」橫額

民主黨往時生日到賀嘅高官一向唔多，但係今年已知最少有六個局長答應出席，加上佢哋上司曾蔭權都親自出席道賀，成個活動「升晒呢」。

不過，出得嚟行遲早要還，有人贈興時，自然有人攞景，一直以狙擊民主黨為己任嘅社民連行委「維園阿哥」任亮憲講明去踩場，今晚嘅民主黨生日會一定好睇過戲。

任亮憲透露，佢同一班「維園行動」以及「選民力量」嘅成員今晚都會去，為咗營造「踢館」效果，佢同「滷味男」錢偉洛會着住功夫衫、帶一幅以毛筆寫住「民主病夫」嘅橫額，加埋一封要求同民主黨主席何俊仁辯論嘅挑戰書。佢話，黨慶咁好日子，何俊仁冇理由唔夠膽接戰，希望對方唔好逃避喎。