政情：工聯阻截翻版梁美芬

工聯擺出直選「５＋１」陣法，棠哥揚言唔排除參選「超級區議會」，政界半信半疑，工聯中人更加當笑話。棠哥回歸前做過兩年立法局議員，九七年卸任時形容議會工作係「浪費青春」，成為經典金句。以棠哥呢種心態，叫佢以後做行政會議、區議員同立法會三料議員，同殺咗佢無分別。所以工聯內部寄望陳婉嫻出山選超級議席，大過搵棠哥落場。

寧充大頭 唔想分票

有人分析，工聯拋出「５＋１」強陣，係針對梁美芬，表明一二年喺九龍西唔再撐梁，呢個推測射錯隔籬。工聯的確唔妥梁美芬○八年得工聯「過票」當選，但事後唔認帳，亦睇唔過眼梁美芬上任後少為具爭議性嘅政府議案護航，但工聯心知梁美芬係西環愛將，加上工聯喺九西缺少悍將，所以無意踢走梁美芬。工聯今次高調出虛招，真正用意係防止一二年選戰嘅建制派協調過程中，再次殺出幾個「梁美芬」，影響工聯喺新東、九東甚至港島區嘅勝算就真。

工聯認為，過往喺特區政府不容有失嘅重大議題，工聯護航不遺餘力，但每到選舉分餅仔，工聯卻要「過票」支持其他候選人，○八年梁美芬就係例子，工聯唔想歷史重演。

消息指，工聯計劃派葉偉明選新東，黃國健同王國興分別喺九東同新西競逐連任，潘佩璆出戰港島亦未斷纜，但同屬建制派嘅龐愛蘭極想出選新東，連未選過立會嘅陳振彬亦有意喺九東一試身手，隨時變梁美芬翻版，工聯可能又被迫分票，所以工聯先發制人，搶閘宣布五區都派人參選，暗示有關人等咪旨意打工聯嘅鐵票主意。

不過話分兩頭，工聯有冇咁多人才為建制派搶到議席呢？葉偉明同潘佩璆一二年直選勝算如何，有目共睹；如果蜀中無大將，但又唔幫盟友，最後能否服人真係好成問題。