政情：軟功冧議員 港鐵衰咗
立法會交通事務委員會尋日應邀參觀港鐵青衣車務控制中心，平時對港鐵諸多不滿嘅王國興（阿王）同范國威（Gary）都係座上客，但佢哋不但冇拉橫額示威，阿王仲大讚中心規模媲美內地嘅衞星發射中心，Gary就形容「超級」車務控制中心同美國太空總署有得揮，唔通港鐵今次「軟銷」成功？錯喇，兩位話口未完又要求港鐵減票價，真係一啖沙糖一啖屎。
參觀控制中心
港鐵呢個指揮重地來頭唔細，除咗輕鐵線，全港十條港鐵線嘅一切動靜，都盡收控制中心嘅巨型弧形銀幕下，鴨仔團參觀期間仲撞啱有乘客喺九龍塘站按緊急掣，電視廣告出現嘅巨型電子鐘隨即計時，連Gary都話過程幾緊張吓！雖然Gary大讚控制中心高水平，但亦不忘話既然港鐵每年賺大錢，好應該減票價回饋市民喎。
阿王就引述港鐵透露，東鐵線遲啲會率先喺馬場站加裝幕門，順利嘅話就會陸續喺其他車站照做，睇嚟馬迷有福，出入馬場比其他東鐵車站嘅乘客安全啲！不過，阿王參觀過後依然堅持對港鐵「應讚則讚，應彈則彈」，睇嚟港鐵想靠呢個活動向議員施軟功爭取支持，似乎未必奏效。