政情：田二少帶隊歐洲取經

田二少話，自從三十年前佢創辦G2000後，每年都會帶隊兩次外遊，從來冇甩拖。今次共有二十位同事同行，全部來自設計同埋產品發展部門，涵蓋旗下五個品牌。行程由九月十日至十九日，主要係穿梭各大百貨公司，例如巴黎嘅老佛爺（Lafayette）、倫敦嘅Harrods等。

歐洲一向係引領世界時裝潮流嘅聖城，不但店舖內嘅商品係佢哋考察對象，連櫉窗設計、行人衣着都逃不過佢哋法眼。二少話，佢哋通常行一陣，就會坐喺露天咖啡座，消化吓參觀心得，喺靚景、靚物嘅配襯下，心情都靚啲，討論起嚟特別有火花，返嚟設計啲產品就自然好喇。