中環出更：珠海社團總會成立 政商嘉賓雲集
凝聚香港珠海鄉親嘅香港珠海社團總會早前舉行成立酒會，由於總會前身係香港珠海聯誼會等八個鄉親社團，今次「八合一」大變身，梗要大事慶祝，多名廣東省及珠海市政府嘅高官政要畀足面撐場，百幾年前喺珠海發迹嘅李錦記，更加出動兩代人嚟撐場。咁熱鬧嘅場合，又點少得喺珠海有好多投資嘅賭王四太梁安琪？
當日出席嘅政商嘉賓雲集，珠海市委副書記兼市長鍾世堅、市委副書記錢芳莉同市政協、人大代表專程嚟港。為咗致謝商界人士長期喺珠海投資，市長仲親自頒贈牌匾畀李錦記同埋四太等人，李錦記第三代傳人、集團主席李文達同埋囝囝李惠中攜手亮相攞獎。平時好少蒲頭嘅李惠中同香港菁英會副主席洪為民（Witman）原來係舊識，不過Witman笑稱，佢哋好少執到咁正見面，通常係打赤膊坦誠相見，事關佢哋都喺馬會游早水。
身為珠海市政協委員嘅四太亦喺百忙之中抽空捧場。佢話澳門毗連珠海，所以賭王喺珠海都有好多投資。卓妮問佢賭王近況，佢話賭王精神好好，又周圍去歎美食。
蔣樂儀散發女強人氣質
當晚有一位貴賓駕到，佢就係廣東省統戰部常務副部長蔣樂儀，佢仲有另一個身份，就係廣東省省長黃華華夫人嘞！卓妮見佢舉止優雅淡定，手挽Chanel黑色經典菱格紋小羊皮靚袋，香肩披掛着頸巾，不經意散發着女強人嘅味道，氣質同內地女幹部好唔同。
當晚除咗舉行總會第一屆董事局就職典禮之外，同時慶祝埋珠海成立特區三十周年，可謂雙喜臨門。會長林漢武成晚忙得不亦樂乎，佢話將來要發揮「社區匯聚，團結萬家」嘅精神，促進港珠交流。
卓妮