中環出更：名人齊撐《狄仁傑》首映禮
由英皇集團主席楊受成投資嘅電影《狄仁傑之通天帝國》，尋晚喺時代廣場舉行首映禮，名人齊撐場。除咗楊受成太太夫唱婦隨外，楊受成細佬楊超成、女婿兼名導演張堅庭、教育局局長孫明揚、工聯會會長鄭耀棠，以及無綫製作資源部總監樂易玲都賞面捧場。
船長獲釋 眾人熱話
日本喺釣魚島海域扣押中國漁船船長詹其雄，引發中日外交風波，尋日日方終於釋放詹其雄，自然成為城中熱話。首映前，眾人你一言，我一語，各抒其見。楊超成話，放人係好事，對中日旅遊業都有幫助。鄭耀棠就要求日本政府就事件道歉及作出賠償。張堅庭認為日方放人是明智嘅做法，否則對經濟影響深遠。
講番睇戲，故事係講及由劉嘉玲飾演嘅武則天登基之日將近，但接二連三發生駭人嘅自焚案，死者全部都係武后嘅親信。武則天聽從國師指引，傳召狄仁傑查案，故事可謂曲折離奇。
