政情：申亞碰釘曾德成插譚耀宗
港府建議豪花四百幾億申辦二○二三年亞運，惹來市民及政黨幾乎一面倒反對，狠批浪費公帑，就連曾經喺立法會動議要求港府申辦亞運嘅民建聯都轉軚反對，迫使港府延長諮詢期救亡。民政事務局局長曾德成就繼續死撐，仲改咗姓「賴」，趁尋日十八區正、副主席每月例會人少少，將申亞處於劣勢嘅責任推晒落民建聯主席譚耀宗身上。
德成局長及發展局局長林鄭月娥尋日喺會議上分別介紹施政報告所列嘅部門相關工作，重複嘅嘢無謂多講，當中最矚目就係德成局長重提申辦亞運一事。據講德成局長提及近期申亞嘅地區諮詢工作，反應係多個區議會原則上支持申亞，普遍意見認為興建地區體育設施對居民有利，但係講講吓，竟然忍唔住發難點名直斥譚耀宗急就章表態反對申亞，搞到政府無彎轉。
跟民意隨風擺柳
德成局長之所以講得咁口響，皆因佢知道好多民記區議員都唔聽黨支笛，事關好多人已表明會用個人名義力撐港府申亞，仲批評譚Sir急就章表態嘅做法。當中有個講法，上月廿八日民記中委會之所以一致通過反對申亞，主要係有較年輕嘅區議員擔心逆民意會影響明年區議會換屆選情，加上當局即將到地區諮詢，所以逼譚Sir盡早表態。
不過，呢個表態搞到民記好尷尬，特別係之前喺立法會提出動議要求政府申亞，變相背上「轉軚」之惡名。有知情人士透露，當日民記中委會反對申亞，其實係啲較年輕又實力不足嘅區議員摸唔清政治形勢，見民意勢色唔對就騰晒雞，佢仲話：「地區起多個球場又點會有市民反對呢？況且港府啲錢唔使呢度，都係冤枉使咗去其他地方啦！」
呢位人兄認為，就算當日中委會上聽到強烈嘅反對聲音，譚Sir都未必要大家立即表決，造成咗個反對申亞嘅立場。況且當日唔少黨高層身在北京參加十‧一活動，起碼聽埋其他黨員意見才表態都未遲。
不過，上述版本係真係假都唔知，分分鐘民記同德成局長扯貓尾補鑊都未定，但可以肯定嘅係，普遍市民都覺得港府申亞係浪費公帑，不如先搞好扶貧，講多都無謂。