政情：鮎魚打亂授勳典禮

或影響高錕親身受勳

政府話由於鮎魚逼近，原定聽日上午同下午喺禮賓府舉行嘅「2010年度勳銜頒授典禮」將會延期，儀式新安排另行通知。呢個消息一出，最失望嘅梗係三百位獲授勳人士啦，特別係攞大紫荊勳章嘅七人，其中包括諾貝爾獎得主高錕同賭王何鴻燊兩位老人家。高錕近月喺香港，出席中大為佢豎立銅像同攞大紫荊兩件大事，高太黃美芸喺九月底話，因為擔心高教授唔記得，所以當時仲未同佢講佢成為咗大紫荊勳章得主。今次改期，唔知對佢親自領取勳章有無影響。

三百獲授勳人士都為今次嘅大日子裝身擦靴，約好至愛親朋出席，準備接受勳章同喺和煦嘅陽光下參加喺禮賓府舉行嘅園遊會，但就因為呢條鮎魚，要集體失望喇。