政情：交諮會換帥上斜有排捱
本港經濟稍為好轉，各種交通工具立即群起加價，電車、小巴、巴士、的士無一幸免，最近連隧道公司亦加埋一份。喺呢一個重要時刻，負責幫市民把關嘅交通諮詢委員會剛巧夠期換主席，由前大律師公會主席袁國強接棒，睇嚟佢要做足功課，如果唔係隨時成為箭靶！
港府尋日宣布，現任交諮會主席嘅資深大律師鄭若驊已經做夠六年，夠鐘離任，由同樣係資深大律師嘅袁國強接棒，任期兩年，下月一日正式上任。
新一代公職王難分身
雖則交諮會只係一個諮詢組織，喺交通工具及隧道加價問題上並無話事權，只有權進行諮詢研究、以及向行政會議提交報告同意見，甚至成日畀人質疑係政府嘅橡皮圖章，但面對依家嘅交通費瘋狂加價潮，交諮會最少都要代表小市民出句聲啩。袁國強最好做足準備，否則隨時會畀人鬧爆！
鄭若驊卸任交諮會主席後仍有大把公職，當中最重要嘅當然係臨時最低工資委員會主席，佢喺臨資會成功帶領勞資雙方委員，就首個法定最低工資水平達成共識，估計將來臨資會「正名」為最低工資委員會後，主席個位都係佢嘅囊中物。
心水清嘅朋友就會留意到，政府最近愈嚟愈鍾意委任啲形象相對中立嘅專業人士，擔任重要委員會嘅掌舵人，除咗鄭若驊同袁國強之外，仲有獨立監察警方處理投訴委員會嘅主席翟紹唐。佢哋三個都係資深大律師出身，亦冇明顯嘅建制、泛民或工商界背景，由佢哋主理交諮會、臨資會同監警會呢類比較敏感、又同基層市民息息相關嘅委員會，政府就會放心晒，冇咁易畀人質疑任人唯親、利益衝突或官商勾結。
好似袁國強咁，依家已經係中央政策組非全職顧問、積金局非執行董事，仲係司法人員推薦委員會委員，政府仲要繼續加公職畀佢，唔通想捧佢做新一代嘅「公職王」？